Società Storica dei Grigioni
Societad Istorica dal Grischun
Historische Gesellschaft Graubünden
Statuts
Art. 1 Num e sedia
Sut la designaziun Historische Gesellschaft Graubünden, Società Storica dei Grigioni, Societad Istorica dal Grischunexista in’uniun en il senn da l’artitgel 60ss. dal Cudesch civil svizzer cun sedia a Cuira.
Art. 2 Intent
La Societad Istorica dal Grischun promova l’enconuschientscha da l’istorgia e da la cultura dal chantun.
Art. 3 Commembranza
La societad consista da commembras e commembers singuls, pèrs, collectivs e d’onur.
La commembranza permetta da sa participar a tut las occurrenzas, cun dretg da votar e d’eleger a la radunanza generala; da sa participar a las occurrenzas betg gratuitas ad in pretsch favuraivel; sco era da retschaiver l’annuari.
La commembranza da pèrs è pussaivla per persunas che abiteschan en la medema chasada per ina contribuziun da commembers reducida per persuna. Commembras e commembers pèrs han il dretg da votar e d’eleger sco duas persunas singulas, retschaivan però in exemplar cuminaivel da l’annuari.
Autoritads, instituts da gener scientific, cultural u sumegliant sco era persunas giuridicas pon daventar commembra collectiva u commember collectiv. Ellas ed els han ils medems dretgs sco ina commembra singula u in commembers singul.
Per giuvenils, per studentas e students e per autras categorias da commembers po la suprastanza reducir per la mesadad la contribuziun da commembers ch’è vegnida fixada da la radunanza generala.
Persunas ch’èn sa fatgas meritaivlas en moda speziala per la societad u per ses intents pon – sin proposta da la suprastanza – vegnir elegidas sco commembras u commembers d’onur.
Art. 4 Admissiun, extrada, exclusiun
Dumondas d’admissiun ston vegnir inoltradas a la suprastanza che decida davart quellas.
La commembranza vegn prolungada mintg’onn cun pajar la contribuziun da commembers.
L’extrada succeda cun ina decleraziun en scrit a la suprastanza.
Davart l’exclusiun da commembras u commembers decida la suprastanza. Cunter la decisiun po vegnir fatg recurs a la radunanza generala, danor en cas d’ina exclusiun pervia d’ina mancanza da pajament da la contribuziun da commembers.
Art. 5 Organisaziun
Ils organs da la societad èn:
a) la radunanza generala
b) la suprastanza
c) las revisuras resp. ils revisurs da quints.
Art. 6 Radunanza generala
La radunanza generala è l’organ suprem da la societad.
Ina giada per onn convochescha la suprastanza las commembras ed ils commembers a la radunanza generala ordinaria.
Radunanzas generalas extraordinarias han lieu, sche la suprastanza concluda la convocaziun d’ina tala u sin dumonda en scrit d’almain in tschintgavel da las commembras e dals commembers.
Davart ina fatschenta po vegnir decis en moda valaivla mo, sche la suprastanza ha mess quella sin la glista da tractandas u sch’ina commembra u in commember ha proponì quella ventg dis avant la radunanza. La glista da tractandas sto vegnir tramessa a las commembras ed als commembers almain diesch dis avant la radunanza.
Art. 7 Incumbensas da la radunanza generala
La radunanza generala ha las suandantas cumpetenzas:
a) eleger la presidenta resp. il president, las ulteriuras commembras ed ils ulteriurs commembers da la suprastanza sco era las revisuras resp. ils revisurs da quints
b) controllar il rapport annual da la suprastanza
c) controllar il quint annual ed il rapport da las revisuras resp. dals revisurs da quints
d) sustegnair la suprastanza
e) fixar la contribuziun da commembers annuala
f) approvar il preventiv
g) midar ils statuts
h) schliar la societad.
Art. 8 Suprastanza
La suprastanza sa cumpona da la presidenta resp. dal president e d’almain quatter* ulteriuras commembras e commembers. Ella constituescha sasezza.
La durada d’uffizi da la suprastanza importa trais onns. Ina reelecziun è pussaivla.
* Midà ils 30-04-2019.
Art. 9 Incumbensas da la suprastanza
La suprastanza s’occupa da tut las fatschentas, per las qualas n’è betg cumpetent in auter organ tras lescha u tras statuts, en spezial:
a) promover e sustegnair tut las activitads che servan a la societad
b) represchentar la societad vers anora e fixar il dretg da suttascripziun
c) administrar las finanzas e far la contabilitad
d) designar las represchentanzas e las delegaziuns en auters gremis
e) preparar la radunanza generala
f) admetter ed excluder commembras e commembers
g) installar ed eleger cumissiuns e gruppas da lavur
h) manar la biblioteca e l’archiv.
Art. 10 Revisuras resp. revisurs da quints
La suprastanza generala elegia duas persunas sco revisuras resp. revisurs da quints ed ina substituziun per ina durada d’uffizi da trais onns.
Las revisuras resp. ils revisurs da quints controllan il quint annual, fan in rapport e preschentan ina proposta a la radunanza generala.
Art. 11 Contabilitad
L’onn da gestiun correspunda a l’onn chalendar.
Art. 12 Meds finanzials
Ils meds finanzials da la societad consistan da las contribuziuns da commembers, da las contribuziuns dal maun public e da donaziuns da terzas persunas.
Per las obligaziuns da la societad stat bun mo la facultad da l’uniun.
Art. 13 Midada dals statuts
Midadas dals statuts ston vegnir approvadas da dus terzs da las commembras e dals commembers ch’èn preschents a la radunanza generala.
Las propostas per midadas ston vegnir communitgadas a las commembras ed als commembers en scrit cun l’invit.
Art. 14 Schliaziun
La schliaziun da la societad sto vegnir approvada da dus terzs da las commembras e dals commembers ch’èn preschents a la radunanza generala.
Davart il diever da la facultad e da las ulteriuras valurs da la societad decida la radunanza generala en il senn da l’intent da la societad.
Art. 15 Disposiziuns finalas
Quests statuts èn vegnids approvads a la radunanza generala dals 12 d’avrigl 2016 a Cuira.
Els entran en vigur cun l’approvaziun e remplazzan ils statuts dals 7 da matg 1994.
Il president: L’actuar:
Florian Hitz Martín Camenisch
Statuts dals 12 d’avrigl 2016: supplement dals 30 d’avrigl 2019
Midada dals statuts da l’art. 8, al. 1, frasa 1: Dumber da commembras e commembers da la suprastanza
A la radunanza generala dals 30 d’avrigl 2019 è la suandanta midada da l’art. 8, al. 1, frasa 1 vegnida approvada unanimamain:
La suprastanza sa cumpona da la presidenta resp. dal president e d’almain quatter ulteriuras commembras resp. ulteriurs commembers.
Il president: L’actuar:
Florian Hitz Martín Camenisch